განათლება
   ნორიოში ფუნქციონირებს კულტურის სახლი. რომელშიც გახსნილია მუსიკისა და ცეკვის შემსწავლელი წრეები. გარდა ამისა სოფელში მდებარეობს ამირან ბოჭორიშვილის სახელობის მუსიკალური სკოლა და საჯარო სკოლა, რომელშიც ამჟამად 500-მდე ბავშვი სწავლობს. ასევე საბავშვო ბაღი.

 სკოლის ეზოში აღმართულია ობელისკი იმ 20 მოსწავლის მოსაგონებლად, რომლებიც სკოლის მერხებიდან II მსოფლიო ომში გაიწვიეს.

   კულტურის სახლის გვერდით კი აღმართულია მემორიალი, სადაც II მსოფლიო ომში დაღუპული 304 ნორიოელის სახელი და გვარია ამოკვეთილი.

  ეკონომიკური და სოციალური მდგომარეობა

        სოფლის მოსახლეობის თითქმის ნახევარი  დაუსაქმებელია. მოსახლეობა ძირითადად დამოკიდებულია თბილისში არსებულ სამუშაო ადგილებზე - ამა თუ იმ ქარხანა- ფაბრიკებში,  მცირე ბიზნესში თუ სახელმწიფო დაწესებულებებში. ასევე ნორიოს მოსახლეობის დიდი ნაწილი მიწათმოქმედებასა და მესაქონლეობას მისდევს და მიღებულ სარგებელს თბილისის ბაზრებში ყიდის. ეს მკაფიო მაგალითია იმისა,  თუ როგორ მჭიდრო კავშირშია სასოფლო და საქალაქო ცხოვრება ერთმანეთთან.  ასევე ნორიოს მოსახლეობის გარკვეული ნაწილი მცირე ბიზნესითაა დაკავებული. მაგალითად მოსახლეობის ნაწილს გარკვეულ ტერიტორიაზე მცირე მეწარმეობის სტატუსით ამუშავებული აქვს ისეთი კომერციული დაწესებულებები როგორიცაა მაღაზია,  აფთიაქი, სილამაზის სალონი, კაფე-ბარი, ავტო სამრეცხაო, საცხობი და ა.შ. შესაბამისად,  სოფელში ჩნდება სხვადასხვა სამუშაო ადგილები.  ამასთან მეტად აღსანიშნავია ისიც, რომ  მოსახლეობის დიდი ნაწილი ბოლო თვეებში დასაქმდა ინვესტორი კომპანიის მიერ, ნორიოს ტერიტორიაზე ჩატარებული ნავთობმოსაპოვებელი სამუშაოების შედეგად.